5. Naalagaaffiup ingerlatai
2021-mi naalagaaffiup ingerlatai 1.386 mio. kr.-inik Kalaallit Nunaanni aningaasanik atuisimapput. 2020-mut sanilliullugu naalagaaffiup ingerlataani aningaasat atorneqartut 2,2 pct.-imik qaffassimapput taamani 1.356 mio. kr.-it naalagaaffimmit aningaasat atorneqarsimapput.
Titartakkami 5.1-mi 2021-mi naalagaaffiup ingerlataasa aningaasat atugaat suliaqarfinnut immikkoortiterneqarsimapput.
Titartagaq
5.1
Naalagaaffiup aningaasartuutai sulianut immikkoortiterlugit
2021
Najoqqutaq: https://bank.stat.gl/OFNFUNK
Inuiaqatigiinni toqqissisimaneq isumannaassuserlu naalagaaffiup ingerlataanni annertunerpaajuvoq. Tassunga ilaapput, politeeqarneq, eqqartuussiveqarneq, parnaarussiveqarneq aamma inissiisarfeqarneq. 2021-mi inuiaqatigiinni toqqissisimaneq isumannaassuserlu naalagaaffiup 953 mio. kr.-inik naalagaaffiup atuiffigisimavai, naalagaaffiup aningaasanik atuinerisa 68,8 pct.-eralugit.
Illersornissaq naalagaaffiup ingerlataasa aningaasanik atuinerisa tullerivaat. Illersornissamut ilaapput; Arktisk Kommando, Slædepatruljen Sirius aamma Upalungaarsimasut (Beredskabsstyrelsen). 2021-mi illersornissamut aningaasat atorneqartut 294 mio. kr.-iupput, 2020-mut naleqqiullugu 17,2 pct.-imik qaffasinneruvoq. Illersornissamut aningaasat atorneqartut naalagaaffiup aningaasanik atuinerisa 21,2 pct.-erivaat.
Nalinginnaasumik pisortat kiffartuussinerinut Søfartsstyrelsen, Kalaallit Nunaanni Naalagaaffiup Sinniisoqarfia aamma misissueqqaarnerit ilaapput tassunga ilaallutik Danmarks og Grønlands Geologiske Undersøgelser (GEUS). 2021-mi nalinginnaasumik pisortat kiffartuussinerinut aningaasat atorneqartut 43 mio. kr.-iusimapput, naalagaaffiup aningaasanik atuinerisa 3,1 pct.-eralugit.
Naalagaaffiup ingerlataasa aningaasat atugaat sulisunut akissarsisitsinernut atuinernut aamma tunisassiornermi atuinermut tunnganerupput. Isertitat aningaasarsiorneq tunngavigalugu agguataarnerini sinneqartoorutitut naatsorsorneqarsimapput, Naalagaaffiup ingerlatai toqqaannartumik danskit naalagaaffiannit aningaasalersorneqartutut naatsorsuutigineqarnerat pissutaalluni.